काडमाडौंं । काठमाडौँ महानगरपालिकाका प्रमुख बालेन्द्र (बालेन) शाहले देशको सार्वभौमिकता र स्वाधीनताको सवालमा कुनै कानुन र अदालतलाई नमान्ने बताएका छन् ।

काठमाडौँका फिल्म हलहरुमा भारतीय फिल्मको प्रदर्शन नरोक्न उच्च अदालत पाटनले अल्पकालीन अन्तरिम आदेश जारी गरेपछि महानगर प्रमुख शाहले सामाजिक सञ्जाल फेसबुकमार्फत भारतीय फिल्म चल्न नदिने भन्दै यसका लागि जुनसुकै सजाय भोग्न तयार रहेको बताएका हुन् ।

फिल्म (भारतीय फिल्म आदिपुरुष) लेखकले नेपाल भारतको अधीनमा थियो भनिसकेपछि उनीहरुको नियत थाहा हुन्छ  भन्दै उनले भने, “यो कुरालाई नेपाल सरकारले स्टन्ट भन्नु र अदालतले फिल्म चल्न दिनु भनेको नेपाल भारतको अधीनमा थियो, अदालत र सरकार भारतको गुलाम भएको बुझिन्छ ।”

यसअघि आजै (बिहीबार) नेपाल चलचित्र संघले दायर गरेको रिटमा बिहीबार सुनुवाइ गर्दै न्यायाधीश धिरबहादुर चन्दको एकल इजलासले भारतीय फिल्मलगायत सेन्सर बोर्डले अनुमति दिएका कुनै पनि चलचित्रको प्रदर्शन नरोक्न अल्पकालीन अन्तरिम आदेश जारी गरेको थियो ।

उक्त विषयमा अन्तरिम आदेश छलफलका लागि अदालतले १२ असारमा दुबै पक्षलाई बोलाएको छ ।

भारतीय चलचित्र आदिपुरुषमा रहेको जानकी भारतीय छोरी हुन् भन्ने आशयको संवाद नहटाएको भन्दै महानगरपालिका प्रमुख शाहले शाहले गत सोमबारदेखि भारतीय चलचित्र प्रदर्शनमा रोक लगाएका छन् ।