नेपाल र चाईनिज ताइपे भिड्दै
काठमाडौं । एएफसी यू-२० महिला एसियन कप छनोटको दोस्रो चरणको तेस्रो तथा अन्तिम खेलमा नेपालले आज शनिबार चाईनिज ताइपेसँग प्रतिस्पर्धा गर्दैछ ।
म्यान्मारको यानगोनस्थित थुवुन्ना स्टेडियममा नेपालले चाईनिज ताइपेको सामना गर्नेछ । नेपाल र चाईनिज ताइपेबीचको खेल दिउँसो २:४५ बजे सुरु हुनेछ ।
नेपाल आज पहिलो जित निकाल्ने योजनामा रहेको छ । यस अघि नेपाल दुबै खेलमा पराजित भएको थियो ।
समूह ‘बी’ मा रहेको नेपालले पहिलो खेलमा म्यानमारसँग ५-० र दोस्रो खेलमा चीनसँग ५-० कै हार बेहोरेको थियो ।
ताइपे पनि पहिलो जित निकाल्ने योजनामा रहेको छ । ताइपेले अघिल्लो दुई खेलमा एक हार र एक बराबरी खेलेको थियो ।
छनोटको समूह ‘बी’ को नेपाल अंक विहीन रहदै पुछारमा रहेको छ । ताइपे १ अंक जोडेर तेस्रो स्थानमा रहेको छ ।
चीन ६ अंक जोडेर शीर्ष र म्यानमार ४ अंक जोडेर दोस्रो स्थानमा रहेको छ ।
प्यालेस्टाइनमा भएको पहिलो चरणको छनोटबाट नेपाल दोस्रो चरणमा पुगेको हो । समूह ‘बी’ मा रहेको नेपाल समूह विजेता बन्दै दोस्रो चरणमा पुगेको हो ।
