साफ च्याम्पियनसिप : आज नेपालले र कुवेत भिड्दै
काठमाडौं । १४ औं संस्करणको साफ च्याम्पियनसिप फुटबल बुधबारबाट भारतमा सुरु हुँदैछ ।
बैंगलोरस्थित श्री कांतिराव स्टेडियममा आयोजना हुने १४ औं साफमा ८ राष्ट्रको सहभागिता रहेको छ ।
यस संस्करणको च्याम्पियनसिपमा नेपालसहित आयोजक भारत, बंगलादेश, कुवेत, लेबनान, भुटान, पाकिस्तान, माल्दिभ्सले सहभागिता जनाउने छन् । यस संस्करणमा कुवेत र लेबनानले आमन्त्रित टोलीको रुपमा खेल्ने छन् ।
च्याम्पियनसिपको उद्घाटन खेलमा साविक उपविजेता समेत रहेको नेपालले कुवेतसँग खेल्दैछ । यो खेल नेपाली समय अनुसार दिउँसो पौने ४ बजे सुरु हुनेछ ।
नेपाल आज कुवेतलाई हराउँदै प्रतियोगितामा सुखद सुरुआत गर्न चाहन्छ । तर, बलियो टोली कुवेतविरुद्ध नेपाललाइ सहज हुने छैन ।
फिफाको वरियतामा नेपाल १७४ औं स्थानमा छ भने कुवेत १४३ औं स्थानमा छ ।
नेपाल र कुवेतबीच अहिलेसम्म ९ खेल हुँदा नेपालले १ मात्र बराबरी गरेको छ भने बाँकी ८ खेल कुवेतले जितेको छ ।
यस्तै पहिलो दिन भारत र पाकिस्तानबीच समेत प्रतिस्पर्धा हुनेछ । पाकिस्तान र भारतबीच राति पौने ८ बजे दोस्रो खेल हुनेछ ।
यस संस्करणको साफमा नेपालको समूहमा साविक विजेता भारत, कुवेत र पाकिस्तान रहेको छ । यस्तै, समूह ‘बी’ मा लेबनान, माल्दिभ्स, भुटान र बंगलादेश रहेको छ ।
