काठमाडौं । विभिन्न सार्वजनिक विषयहरुमा निर्धक्क प्रतिक्रिया दिने कलाकारमा पर्छन्, दिपकराज गिरी । उनको यहीँ स्वभावका कारण उनी कहिले तालीको हकदार त कहिले गालीका शिकार भइरहेका पनि हुन्छन् ।

हरेक विषयमा बोल्ने गिरीले अहिले चलिरहेको हट टपिकमा आफ्नो धारणा व्यक्त नगर्ने त कुरै भएन । अहिले सामाजिक सञ्जाल महापुरुषमय भएको छ । उनले यस विषयमा पनि आफ्नो धारणा व्यक्त गर्न पछि परेनन् ।

तर यसपालि भने उनलाई दर्शकको साथ भन्दा धेरै आलोचना मिलेको छ । उनको धारणाप्रति उनकै निकट सहकर्मी माग्नेबुढा(केदार प्रसाद घिमिरे)ले कडा टिप्पणी दिएका छन् ।

दक्षिण भारतीय चलचित्र ‘आदिपुरुष’ मा समावेश ‘जानकी भारतीय छोरी हुन्’भन्ने विवादित संवाद हटाउन काठमाडौंका मेयर बालेन्द्र शाहले ३ दिनको अल्टिमेटम दिएका थिए ।

दिएको समयसम्ममा पनि उक्त संवाद चलचित्रबाट नहटाएपछि बालेनले आइतबार हलहलमा नगर प्रहरी पठाएर काठमाडौं क्षेत्रभित्र कुनै पनि हिन्दी चलचित्र नलगाउन निर्देशन दिए । सधैँ भारतीय चलचित्रको थिचोमिचोमा परेको गुनासो गर्ने नेपाली चलचित्रकर्मीहरू बालेनको शो निर्देशनपछि खुशी देखिए । उनलाई समर्थन गर्दै धेरैले उनको स्टाटस शेयरसमेत गरे ।

अधिकतम चलचित्रकर्मीले समर्थन जनाइरहँदा गिरीले भने असन्तुष्टि व्यक्त गर्दै आइतबार आफ्नो सामाजिक सञ्जालमा एक स्टाट्स लेखे । उनले लेखेका थिए, ‘समस्या आदिपुरूषले निकालेको हो त्यसैले आदिपुरुष मात्रै बन्द गरौं । उताबाट आउने सबै फिल्म बन्द गर्दा गलत अर्थ लाग्ला कि ? उताबाट त धेरै कुरा आउँछ ।’

उनको शो स्टाटसपछि गिरीलाई गालीको ओइरो नै भयो । छिमेकी देश भारतलाई समर्थन गरेको बताउँदै उनको आलोचना सुरु भयो । आलोचनाको बाढी आएपछि उनले आज बिहान पुनः अर्को एक स्टाटस लेखे, ‘एउटा भाइले भने ‘दाइ फेसबुक हेर्नु भो तपाईंले गाली खाइरहनु भएको छ । मैले भने ‘होइन भाइ कसैले गाली दियो होला तर मैले खाएको छैन ।’

आफूले जतिसुकै गाली खाएपनि बेवास्ता गरेको उनको स्टाटसको तात्पर्य थियो । तर यसैबीच उनका निकट सहकर्मी माग्नेबुढा(केदार प्रसाद घिमिरे) ले उनकै स्टाटसमा दिएको टिप्पणी पछि भने उनलाई आलोचना गर्नेको संख्या थप बढेको छ । उनले लेखेका छन, ‘छिमेकी र बाउको झगडा परेको बेलामा छिमेकीलाई फाइदा पुग्ने गरी बोल्दा दाजुभाईको एकदुई मुक्का भेट्नु सामान्य कुरा हो ।’

माग्नेबुढाले आफ्नो टिप्पणीमार्फत भारतलाई छिमेकी र गिरीले छिमेकीलाई फाइदा पुग्ने काम गरेको आशय दिएका छन् । सोही कारण गिरीले दर्शकको गाली खाएको उनको तात्पर्य छ । उनको उक्त टिप्पणीपछि कमेन्ट्समा माग्नेबुढाको तारिफ भइरहेको छ । उनलाई दर्शकले समर्थन जनाइरहेका छन् भने गिरीलाई झनै गालीको ओइरो भइरहेको छ ।

उनको यस्तो टिप्पणीपछि गिरीले उनलाई प्रतिक्रिया दिँदै लेखेका छन, ‘वाउ, मेरो भाइको अर्को लोकप्रिय टिप्पणी । स्टाटस नै लेखेको भए अझ बढी लाइक आउँथ्यो बाबु ।’ कमेन्ट्समै दुईजनाको यस्तो भनाभनपछि हेर्नेलाई रमिता भएको छ । सबैले आफ्नो तरिकाले धारणाहरु व्यक्त गरिरहेका छन् ।

केही समय अघि महानायक काण्ड पछि उब्जिएको मनमुटावका कारण मुन्द्रे(जितु नेपाल) टिमबाट बाहिरिएका थिए । माग्नेबुढा र दिपकराज गिरीको कमेन्ट्समै भएकोे भनाभन देखेपछि अधिकतमले कमेन्ट्समार्फतै यो जोडी पनि फुट्ने हो की भन्ने कौतुहल प्रकट गरिरहेका छन भने कतिले माग्नेबुढाले फेरि छक्का-पञ्जा खेल्न पाउलान त भन्ने प्रश्न पनि गरिरहेका छन् ।