काठमाडौं । राष्ट्रिय स्वतन्त्र पार्टी (रास्वपा) सभापति रवि लामिछाने पक्राउ परेका छन् । संगठित रूपमा सहकारी ठगी गरेको आरोप लागेका लामिछानेलाई उच्च अदालत बुटवलको इजलासले थुनामा पठाउन आदेश दिएपछि प्रहरीले  हिजो शुक्रबार राति घरमै गएर उनलाई पक्राउ गरेको हो ।

प्रहरीका अनुसार उनलाई हिजो शुक्रबार राति काठमाडौं जिल्ला प्रहरी परिसरको हिरासतमा राखिएको थियो । आज शनिबार मात्रै उनलाई भैरहवा लग्ने तयारी गरिएको छ । शुक्रबार उच्च अदालत बुटवलले थुनामा पठाउने आदेश गरेलगत्तै बूढानीलकण्ठस्थित लामिछानेको निवासमा प्रहरीको टोली पुगेको थियो । बुटवलको सुप्रिम सहकारी प्रकरणमा जिल्ला अदालत रुपन्देहीले उनलाई एक करोड धरौटी माग गरेको थियो । उक्त आदेश चित्त नबुझेपछि उनी उच्च अदालत पुगेका थिए । तर, उच्च अदालतले थुनामा पठाउन आदेश दिएपछि उनलाई प्रहरी हिरासतमा राखिएको हो ।