काठमाडौं । जडीबुटी उत्पादन तथा प्रशोधन कम्पनीमा सञ्चो उत्पादन गर्ने भवनमा सल्किएको आगो नियन्त्रणमा आएको छ । कम्पनीकी महाप्रबन्धक संगीता यादवका अनुसार, कार्यालयको मुख्य भवनमा सुरु भएको आगजनी सञ्चो उत्पादन गर्ने भवनमा समेत सल्किन पुगेको थियो ।

‘अहिले आगो नियन्त्रणमा आएको जानकारी सुरक्षागार्डबाट पाएको छु’, यादवले भनिन्, ‘ठूलो विस्फोट हुनबाट जोगियो ।’ आगोबाट कम्पनीको मुख्य कार्यालय भवन र सञ्चो उत्पादन गर्ने भवन पूर्णरुपमा जलेको छ । सञ्चो उत्पादन गर्न राखिएको तेलको स्टोर बचाउन सफल भयौं,’ यादवले भनिन् ।

आन्दोलनकारीले पार्किङमा रहेका आधा दर्जन गाडीमा आगजनी गरेका थिए । यादवका अनुसार अफिसका कर्मचारी भित्र बसेर काम गरिरहेका बेला बाहिरबाट अचानक ढुंगामुढा भएको थियो । भवनको सिसा फुटाउन थालेपछि कर्मचारी ज्यान जोगाउन पछाडिको बाटो भएर भागेका थिए ।