काठमाडौं । चालु आर्थिक वर्षको पहिलो छ महिनामा विप्रेषण (रेमिट्यान्स) आप्रवाहमा उल्लेखनीय वृद्धि भएको छ। नेपाल राष्ट्र बैंकले सार्वजनिक गरेको तथ्यांकअनुसार, यस अवधिमा रु सात खर्ब ६३ अर्ब आठ करोड बराबरको विप्रेषण भित्रिएको छ, जुन अघिल्लो वर्षको सोही अवधिको तुलनामा चार दशमलव एक प्रतिशतले वृद्धि भएको हो। अघिल्लो वर्ष यो वृद्धिदर २२ दशमलव दुई प्रतिशत रहेको थियो।

अमेरिकी डलरमा विप्रेषण आप्रवाह एक दशमलव एक प्रतिशतले बढ्दै रु पाँच अर्ब ५८ करोड पुगेको छ। तुलनात्मक रूपमा, अघिल्लो वर्ष यो वृद्धिदर १९ दशमलव पाँच प्रतिशत रहेको थियो।

नेपालको कुल विदेशी आम्दानीमा विप्रेषणको महत्त्वपूर्ण योगदान रहँदै आएको छ। समीक्षा अवधिमा खुद द्वितीय आय (खुद ट्रान्सफर) रु आठ खर्ब ३२ अर्ब ७६ करोड पुगेको छ, जुन अघिल्लो वर्षको सोही अवधिमा रु सात खर्ब ९९ अर्ब ५४ करोड रहेको थियो।

वैदेशिक रोजगारीमा जाने नेपाली श्रमिकको सङ्ख्या पनि उल्लेखनीय रूपमा बढेको छ। समीक्षा अवधिमा अन्तिम श्रम स्वीकृति (संस्थागत तथा व्यक्तिगत–नयाँ) लिने नेपालीको सङ्ख्या दुई लाख ३० हजार चार सय ३९ पुगेको छ भने पुनः श्रम स्वीकृति लिनेको सङ्ख्या एक लाख ६२ हजार छ सय २८ रहेको छ। अघिल्लो वर्षको सोही अवधिमा यो सङ्ख्या क्रमशः दुई लाख हजार तीन सय ९० र एक लाख ३३ हजार नौ सय ४० रहेको थियो।

विप्रेषण आप्रवाहको यो वृद्धिले मुलुकको विदेशी मुद्राको सञ्चितिमा सकारात्मक प्रभाव पार्ने देखिन्छ। साथै, रोजगारीका लागि विदेशिने नेपालीहरूको सङ्ख्या निरन्तर बढ्नु आन्तरिक श्रम बजार र आर्थिक नीतिहरूको प्रभावकारिता माथि पुनः समीक्षा गर्नुपर्ने संकेत पनि हो।