काठमाडौं । नेपाली चलचित्र ‘डोरी’को नयाँ पोस्टर सार्वजनिक गरिएको छ । यसअघि सार्वजनिक पहिलो पोस्टरमा कलाकार वीरेन्द्र सिंह कुशवाहालाई मात्र चित्रित गरिएको थियो । नयाँ पोस्टरमा फिल्मका मुख्य कलाकारहरु प्रवीण खतिवडा, शिशिर बाङ्देल, प्रकाश घिमिरे, अरुण लामा, अञ्जना बराइली, राज पौडेल, कविता आले, नूतन र राज थापालाई चित्रित गरिएको छ ।

पोस्टरको केन्द्रमा अञ्जना छिन्, जसले फिल्ममा उनको चरित्रको महत्वलाई संकेत गर्छ । उनी पारम्परिक पोसाकमा हँसिलो भावमा देखिएकी छिन् । अन्य पात्रहरु विभिन्न भावभङ्गीमा प्रस्तुत छन् । पोस्टरमा केही पात्रहरुलाई रोचक ढङ्गले प्रस्तुत गरिएको छ । जसले फिल्मको कथावस्तुमा हास्य, संघर्ष, र गम्भीर भावनाहरुको मिश्रण रहेको संकेत गर्छ ।

चलचित्र आगामी चैत १५ देखि देशभरका सिनेमा घरहरूमा प्रदर्शन हुने तयारीमा रहेको छ । ‘डोरी’को लेखन तथा निर्देशन अरुण लामाले गरेका हुन् । चलचित्रको निर्मातामा दिनेश भट्टराई छन् भने कार्यकारी निर्माताको जिम्मेवारीमा राज थापा सम्हालेका छन् । मनोज पण्डित स्क्रिप्ट डाक्टर रहेको ‘डोरी’मा मुख्य सहायक निर्देशक दिनेश बहादुर रावत, एक्सन निर्देशक राजु तामाङ, सङ्गीत राजनराज सिवाकोटी, कला निर्देशक रोशन दिवाना, स्थल ध्वनि रेकर्डिस्ट किशोर खनाल, सम्पादक मिलन श्रेष्ठ तथा रङ्ग संयोजक रेनीश फागो छन् ।