काठमाडौं ।  राष्ट्रिय स्वतन्त्र पार्टीका सभापति रवि लामिछानेलाई रूपन्देहीबाट कास्की लगिएको छ । बुटवलको सुप्रिम बचत तथा ऋण सहकारीको रकम अपचलन प्रकरणमा संगठित अपराधको अभियोगमा बयानका लागि रूपन्देही ल्याइएका लामिछानेको बयान सकिएपछि आज कास्की लगिएको हो। बिहान पौने ८ बजे नै कास्की लगिने तयारी भएपनि मौसम खराबीका कारण विमानस्थल खुल्न नसक्दा दिउँसो पौने २ बजेमात्र पोखरातर्फ विमानबाट लगिएको रूपन्देही प्रहरीले जनाएको छ।

गत मंगलबार कास्कीको पोखराबाट रुपन्देहीको भैरहवा ल्याइएका लामिछानेलाई सरकारी वकिलको कार्यालय रुपन्देहीले मंगलबारदेखि नै नियमित बयान लिइरहेको थियो । बुटवलको सुप्रिम सहकारीबाट लामिछानेको नाममा एक करोड ९६ लाख रुपैयाँ गोर्खा मिडिया नेटवर्क प्रालिमा गएको संसदीय विशेष छानबिन समितिको प्रतिवेदनमा उल्लेख छ।