काठमाडौं । इजरायल र हिजबुल्लाहबीच जारी द्वन्द्वमा इजरायलले ठूलो सफलता हासिल गरेको छ । हालैको हवाई हमलामा इजरायली सेनाले हिजबुल्लाहका शीर्ष कमाण्डर इब्राहिम अकिललाई हवाई आक्रमणमा मारेको छ । अबिललाई लेबनानको राजधानी बेरुतमा आज शनिबार बिहान गरिएको हवाई हमलामा मारिएको इजरायली सेनाले पुष्टि गर्दै हवाई आक्रमणसम्बन्धी भिडियो पनि जारी गरेको छ ।
अकिल एक अन्तर्राष्ट्रिय आतंकवादी भएको र जसलाई अमेरिकाले ७० लाख डलरको इनामसहित आतंकवादी घोषणा गरेको थियो। यस हमलामा इब्राहिम अकिलको मृत्युले हिजबुल्लाहलाई ठूलो चोट पुर्‍याएको छ, किनकि उनी हिजबुल्लाह संगठनभित्र दोस्रो सबैभन्दा प्रभावशाली व्यक्ति थिए, जसले हिजबुल्लाहका प्रमुख हसन नसरुल्लाहलाई सीधा रिपोर्ट गर्दथे ।

यसअघि जुलाईमा इजरायलले सोही क्षेत्रमा हिजबुल्लाहका अर्का शीर्ष कमाण्डर फुआद शुक्रलाई पनि मारेको थियो । इजरायली आक्रमणले हिजबुल्लाहको नेतृत्वलाई कमजोर बनाउँदैछ, जसले संगठनको सैन्य क्षमतालाई असर गर्न सक्छ। यसअघि हिजबुल्लाहले उत्तरी इजरायलमा १४० भन्दा बढी रकेट प्रहार गरेको थियो। जवाफमा, इजरायली सेनाले ठूलो हवाई हमला गर्‍यो, जसमा अकिल मारिए। बेरुतको दक्षिणी छिमेकमा हिजबुल्लाहको अभिजात वर्ग “रदवान एकाइ को बैठकको क्रममा आक्रमण भएको थियो। आक्रमणमा कम्तीमा ९ अन्य व्यक्तिको पनि मृत्यु भएको छ भने करिब ६० जना घाइते भएका छन् ।

को थिए इब्राहिम अकिल ?

इब्राहिम अकिल, जसलाई तहसिन र अब्देलकादर पनि भनिन्छ, हिजबुल्लाहको सैन्य निकाय जिहाद काउन्सिलका सदस्य थिए। उनलाई सन् १९८३ मा अमेरिकी दूतावास र समुद्री ब्यारेकमा भएको दुईवटा ट्रक बम विस्फोटका लागि जिम्मेवार मानिएको थियो, जसमा ३०० भन्दा बढी व्यक्तिको मृत्यु भएको थियो। अमेरिकी गुप्तचर एजेन्सीहरूले उनलाई विश्वव्यापी आतंकवादी घोषणा गरेका थिए र उनको टाउकोमा ७० लाख डलर  पुरस्कार घोषणा गरेका थिए ।

हिजबुल्लाहमा इरानी समर्थन र भूमिका

इब्राहिम अकिललाई सन् १९८० को दशकमा इरानको रिभोलुसनरी गार्ड्सले तालिम दिएको थियो। उनी लेबनानको बेका उपत्यकाबाट बाहिर आए र हिजबुल्लाहको शीर्ष नेतृत्वमा आफ्नो स्थान बनाए। यसअघि उनी लेबनानको अमल राजनीतिक आन्दोलनको हिस्सा थिए। अकिलले हिजबुल्लाहलाई सानो संगठनबाट लेबनानको सबैभन्दा शक्तिशाली राजनीतिक र सैन्य शक्तिमा परिणत गर्न प्रमुख भूमिका खेलेका थिए।

अमेरिका र अन्य देशहरूको प्रतिक्रिया

अकिलको मृत्युमा अमेरिकाले खुशी व्यक्त गरेको छ । अमेरिकी अधिकारीहरूले लामो समयदेखि इजरायल र पश्चिमका लागि खतरा बनेको हिजबुल्लाहविरुद्धको यो ठूलो जित भएको बताएका छन्। अमेरिकाले अकिललाई सन् १९८३ मा अमेरिकी दूतावासमा भएको बम विस्फोटलगायत धेरै अपहरण र हत्याका लागि जिम्मेवार ठहर गरेको थियो।