“पानी ल्याउने अस्थायी संरचनाहरू सबै पुरिएको छ। फेरि अस्थायी रूपमा पानी ल्याउनका लागि हेडवर्क्समा जम्मा भएको नदीजन्य पदार्थ सबै सफा गरेर ढोकाहरू पनि मर्मत गर्नुपर्ने छ,” आयोजना सञ्चालन गर्ने मेलम्ची खानेपानी विकास समितिका प्रवक्ता राजेन्द्रप्रसाद पन्तले बीबीसी न्यूज नेपालीसँग भने। यसअघि अस्थायी रूपमा पानी ल्याउन बनाइएको २१० मिटर लामो सुरुङमा पनि ढुङ्गा र गेग्रानहरू भरिएको आयोजनाले जनाएको छ। बाढीले आयोजनाको एक नम्बर गेटमा क्षति पुर्‍याएर सुरुङभित्र पनि नदीजन्य पदार्थ गएको आकलन गरिएको छ। तर हाल पुरिएकै अवस्थामा रहेका कारण कति क्षति भयो भन्ने आकलन आयोजनाले गर्न सकेको छैन। आयोजनाले निर्माण व्यवसायीलाई भएका उपकरण र जनशक्ति परिचालन गरेर “सकेसम्म छिटो” पुरिएको ठाउँ पन्छाउन भनिसकेको पन्तले जानकारी दिए।

नयाँ मुहान बनाउन करिब ४ वर्ष लाग्ने

नयाँ मुहान पुरिएको पुरानो मुहानबाट अझै माथि बनाउन प्रस्ताव गरिएको छ । आयोजनाका अनुसार नयाँ मुहान बनाएर स्थायी रूपमा मेलम्चीको पानी काठमाण्डू ल्याउने संरचना तयार गर्न अझै करिब चार वर्ष लाग्नसक्छ। आयोजनाले विश्व ब्याङ्कको अध्ययनमा आफ्ना प्राविधिकहरूबाट पनि थप अध्ययन गराएर निर्णय लिइने जनाएको छ। खानेपानी मन्त्रालयले त्यसका लागि एउटा टोली गठन गरिसकिएको जनाएको छ। “आयोजनालाई तीन चार वर्ष त्यत्तिकै छोडेर नयाँ मुहान बनाउने वा बर्खायाम सकिएपछि अस्थायी संरचना बनाएर पानी ल्याउने त्यो विषयमा पनि निर्णय हुन बाँकी छ,” पन्तले भने।