काठमाडौं । विरोध प्रदर्शनमा उत्रिएका मिटरब्याज पीडितहरुले गृहमन्त्री नारायणकाजी श्रेष्ठको राजीनामा माग गरेका छन् ।

राजधानीको माइतीघर मण्डलामा मंगलबार विरोध प्रदर्शन गर्दै सोमबार प्रहरीबाट रत्नपार्क शान्तिवाटिकामा भएको लाठी प्रहारको उनीहरूले निन्दासमेत गरे ।
आफूहरुको माग सम्बोधन गर्नुको साटो गृहमन्त्री श्रेष्ठले प्रहरी प्रशासन लगाएर दमन गरेकाले त्यसको विरोधमा प्रर्दशन गर्नु परेको उनीहरुले बताएका छन्। प्रहरीसँगको झडप केही मिटरब्याजपीडतहरू घाइते थिए। शान्तिपूर्ण आन्दोलनमा रहेकालाई सरकारले दमन गरेको भन्दै मिटरब्याजविरुद्ध किसान–मजदुर संघर्ष समितिका संयोजक अवधेश कुशवाहले आपत्ति जनाए ।

सरकारले मिटरब्याजपीडितको एक समूहसँग १८ चैतमा ५ बुँदे सहमति गरेको थियो । तर उक्त सहमतिले मिटरब्याजपीडितको समस्या तत्काल समाधान नहुने भन्दै उनीहरू अर्को समूह २० चैतदेखि आन्दोलनरत् छन् ।

राप्रपाद्वारा प्रहरी ज्यादतीको विरोध

यसैगरी राष्ट्रिय प्रजातन्त्र पार्टीले सोमबार मिटरब्याजपीडितमाथि प्रहरी ज्यादती विरोध गरेको छ । प्रतिनिधिसभाको मंगलबार बसेको बैठकको सुरुमै राप्रपाका अध्यक्ष राजेन्द्र लिङ्देनले न्यायका लागि संघर्ष गरेका मिटरब्याजपीडितमाथि प्रहरीले आक्रमण गरेको भन्दै भर्त्सना गरेका हुन् ।

राज्य भएको अनुभूति गराउनुपर्ने सरकारले न्यायका लागि याचना गरेका पीडितमाथि नै आक्रमण हुनु दुःखद् भएको भन्दै उनले मिटरब्याजपीडित र तराई क्षेत्रमा संघर्षमा उत्रिएका हरुवाचरुवाको न्यायका लागि आफूहरू सडकमा उत्रने सक्ने बताए ।